A Historia de Brancaflor

Descrición

As mellores historias son sempre as que están sen escribir, sen ler, sen contar. Aquelas nas que aínda está por crear o final, o inicio, a trama, as personaxes, ... Pero, sobre todo, as mellores historias son as que poden saír do maxín dos nenos e nenas.

Un espectáculo a medio camiño entre a maxia e o contacontos dirixido polo Premio María Casares Avelino González. A través da maxia e do clown contase a lenda de Brancaflor. Os 11 pretendentes de Brancaflor asócianse con cadanseu xogo de maxia e ela terá que seleccionar o seu namorado ao longo dunha hora de maxia, contos e humor para grandes e pequenos.

Os Sete Magníficos máis Un propoñen nesta ocasión un espectáculo de animación á lectura dun xeito distinto: a partir de sinxelos xogos de maxia, do clown, da participación do público e da marabillosa tradición narrativa galega.

A partir de textos de autores e autoras galegos/as; adaptados polo recoñecido actor, director e dramaturgo Avelino González; o noso protagonista intentará resolver a través de rutinas máxicas e da cooperación co público todos os impedimentos e probas que se lle presentan a Brancaflor durante a trama da historia.