Sacar a lingua a p(r)acer é unha proposta que responde ao Teorema do Caldeiro: muxir unha vaca e logo botarlle o caldeiro cheo de leite por riba da cabeza. As historias que conflúen nas contadas desta peza mesturan o humor, a tradición oral, a literatura galega e universal e os sucedidos, aqueles feitos que o contador de historias Lois Pérez escoitou ou dixo que escoitou polo mundo adiante. Así, en áxil carreira constante polo seu cerebro, as historias van mudando dependendo do día, a hora e o estado de ánimo do animal escénico (máis animal ca escénico!). E algo máis que non se sabe o que é, pero que é o máis importante.