Desde Culturactiva somos o que somos polos nosos proxectos. Coa idea sempre presente de programar cultura participativa, democrática e para a xente, esta cooperativa de xestión cultural ten levado a rúas e teatros propostas coma o Festival de Cimema Olladas do planeta, a programación musical Galeuzca, os programas alternativos para a mocidade Festactiva, o Menú do Humor, Magiclown, Terractiva, Festiclown...

Divertindo, facendo rir, tomando o humor como algo moi serio, pero tamén ofrecendo formación en risoterapia, clown e outras artes escénicas, surtimos de propostas de lecer alternativo, horizontal e respectuoso coa contorna a entidades públicas, colectivos, festivais, programacións de todo tipo e, finalmente, ao publico en xeral, tanto en Galicia coma noutros puntos do Estado.

Solidariedade

Ademais, desde Culturactiva SCG promevemos unha dinámica de traballo baseada na igualdade entre os pobos e a convicción de que a cultura serve para camiñar, para facer guieiros cara a dignidade.

Mais esta forma de facer non só a puxemos en práctica organizando e participando en campañas de acción internacional a Chiapas ou Palestina, senón tamén levando desde os nosos comezos teatro de calidade ás parroquias, ás asociacións, ás ampas de colexios, a concellos ou aos festivais máis prestixiosos do Estado.