Fototeca do Terractiva 2008

Pincha aquí para ver as fotos que do Festival das artes pola Biodiversidade "Terractiva" realizou o fotógrafo pontevedrés Brais Palmás.

Remata un dos Terractiva máis participativos

“Un público heteroxéneo e, sobre todo, participativo”. Así valora a asistencia á edición 2008 do festival das artes pola Biodiversidade o seu director, Iván Prado. Con cifras semellantes ás doutros anos, o feito a salientar nesta ocasión é o “carácter reivindicativo” que adquiron algunhas das actividades, coma o foro ecolóxico do domingo ou a mesa redonda sobre o plano acuícola do sábado.

Ademais, as actividades máis destacadas no programa, coma as da sección Altofalante, os concertos do Galeuzca, as funcións de teatro e, como vén sendo habitual ao longo das edicións, a feira ecolóxica, foron as que máis público congregaron e tamén as que acadaron unhas cotas de participación máis activa por parte das e dos asistentes. Se ben, o director desta programación polo medio ambiente e a ecoloxía quéixase de que, para ser a sexta edición do festival, “aínda non temos a implantación que merece esta proposta única na Península”. Así as cousas, Iván Prado fixo tamén fincapé na necesidade de que persoas doutros puntos do Estado se acheguen tamén ao Terractiva, dada a súa singularidade no marco das feiras ecolóxicas, cando estas non adoitan ofreceren espazos para o encontro de colectivos, persoas e o debate de problemáticas sociais como é o Terractiva, xa que logo, “unha proposta integral por unha cidadanía máis consciente da súa vinculación coa terra”, continúa a decir Iván Prado. No que respecta á composición do público, cómpre dicir que persoas de todas as idades, procedencias, intereses e distancias co mundo do ecoloxismo se achegaron á edición 2008 do Terractiva. Deste xeito, a heteroxeneidade das e dos visitantes é unha das notas máis positivas para a organización, dado que achegar os contados do festival ao maior número de persoas é un dos obxectivos de cada edición. Títeres e humor Porque non só de ecoloxía vive o Terractiva, dúas sesións de monicreques se celebraron durante a segunda xornada do festival. O Teatro Tradicional de Títeres de Chile foi o encargado de representar, o domingo, xunto con La Vereda Teatro na xornada do sábado, sendas obras para todos os públicos. No que respecta á risa, foron os encargados de traela a Arzúa os monologuistas Pedro Brandariz e David Amor. Xogos da terra e formaterra Durante as dúas xornadas de festival, a ludoteca dos Xogos da terra convertiuse nun espazo de xogos, entretemento e introdutor de contidos ecolóxicos para os máis pequenos, entre eles a reciclaxe, ademais de ser un vivieiro de risos, carreiras e diversión. Ademais, e como parte dunha proposta ampla e con vontade integradora no que a formación se refire, os cusos do Formaterra e os obradoiros foron programados coa intención de encher o baleiro que hoxendía existe de cursos de terapias alternativas ou métodos de constución respectuosa coa contorna, entre outros.

Terractiva convírtese no espazo ecolóxico máis importante do país

A organización do festival Terractiva amosa a súa satisfacción logo da celebración, na primeira xornada da edición 2008 dunha mesa redonda na que se debatiu o Plan Galego de Acuicultura. Para o director da programación, Iván Prado, este é un “paso moi importante, xa que representantes parlamentarios do Bloque Nacionalista Galego (BNG) e do Partido Popular (PP) ”participaron xunto a plataformas cidadás” nun mesmo espazo para o debate. Neste sentido, o diálogo entre os políticos, os membros dos colectivos e o público foi “ardente” e foron moi palpábeis as tensións entre os responsábeis políticos.

Se aforndarmos no dito anteriormente, un dos aspectos a destacar foi a ausencia xefe de Acuicultura da Secretaría Xeral de Recursos Mariños da Consellería de Pesca da Xunta de Galicia, Juan Ramón Otero Llovo. Segundo comentou Iván Prado, foi “un feito lamentable que o goberno decidise non asistir ao encontro cando este representante xa confirmara a súa presenza” e que “nin xustificase nin respondese” as chamadas da organización, afirmou o director do Terractiva. Quen si estivo presente foi o voceiro de Pesca do Grupo Parlamentario do Partido Popular no Parlamento de Galicia, José Manuel Balseiro Orol, o voceiro de Pesca do Grupo Parlamentario do Bloque Nacionalista Galego no Parlamento de Galicia, Bieito Lobeira Domínguez, o secretario executivo da Asociación para a Defensa Ecolóxica de Galiza (ADEGA), Fins Eirexas, o membro da AA.VV. "A Pergoliña" de Camelle, Luis Miguel Suárez Pérez, e o membro da Plataforma veciñal pola Defensa do Patrimonio Cultural de Quilmas (Carnota), Xosé Manuel Casais González. Entre as conclusións máis salientábeis do dito encontro atópase a toma de posicións de cada un dos representantes a respecto das súas reivindicacións como grupos políticos. Trasladáronse á mesa redonda os debates parlamentares entre os dous representantes dos partidos, que aproveitaron para defenderen os intereses das súas respectivas formacións a través dos dous planos acuícolas que ambos partidos aprobaron estando no goberno. Ambos os dous representantes dos colectivos cidadáns coincidiron en afirmar a destrucción do litoral, de empregos e de posibilidades turísticas e de desenvolvemento que suporía a construcción ou ampliación das piscifactorías, mentres que o representante de ADEGA fixo fincapé en definir os obxectivos de calquera plano acuícola e cuestionou a realización destas medidas políticas polos seus mentores xa que habería moitos outros aspectos da produción acuícola que non aparecerían reflectidos nestes proxectos, coma o mexilón ou outras especies mariñas coma o salmón. Se ben, ás supostas intervencións das persoas convidadas, sumáronse as repostas e réplicas do público, que “engadiron ritmo” á mesa redonda e convertiron a actividade “nunha sorte de asamblea”, tal e como dixo Iván Prado, na que se analizou a forma de proceder dos políticos, as repercusións urbanísticas dos planos acuícolas…, mais, sobre todo, o que estas intervencións procuraron foi unha defensa e respecto pola Terra da que lles achacaron carencia aos políticos. Ao respecto, un sentir xeral destas persoas participantes foi tamén a preocupación por teren que verse representadas por estes partidos políticos cando están en xogo, segundo dixeron, os seus dereitos como pobo. Altofalante A esta mesa redonda súmase a proxección e presentación do documental “Unha lousa sobre o Courel”, que os seus produtores, Mabel Ribera e Henrique Banet realizaron tamén durante a primeira xornada do Terractiva. Ademais, un grande nivel de asistencia e a alta participación do público promoveron un improvisado debate posterior. Unha feira chea de actividades Malia o éxito de convocatoria destas dúas actividades, preto de 300 persoas asistiron ao espectáculo de teatro “Catalina y los bosques de hormigón”, e preto dun milleiro se xuntou nos concertos do Galeuzca. Ademais, a feira ecolóxica, cursos formativos de Formaterra e os obradoiros gratuítos foron outras das iniciativas máis demandadas polo público. O programa continúa no domingo con máis formación, teatro, exposición e venda de produtos e servizos ecolóxicos ou diversas demostración, entre outras propostas.

PSOE, BNG, PP e plataformas cidadás participan nunha mesma mesa redonda do Terractiva

O Plan Galego de Acuicultura vai ser analizado por representantes dos tres partidos maioritarios na Galiza e membros de diversas plataformas ciadadás do país no marco dunha mesa redonda que o Terractiva programou para o vindeiro sábado 18 ás 20 horas. Ademais, un foro ecolóxico no domingo, o Formaterra, a meirande feira ecolóxica do país xunto cos cursos formativos e demais actividades dan forma a esta edición do festival.

No que respecta á mesa redonda do “Plan Acuícola”, o xefe de Acuicultura da Secretaría Xeral de Recursos Mariños da Consellería de Pesca da Xunta de Galicia, Juan Ramón Otero Llovo, o voceiro de Pesca do Grupo Parlamentario do Partido Popular no Parlamento de Galicia, José Manuel Balseiro Orol, o voceiro de Pesca do Grupo Parlamentario do Bloque Nacionalista Galego no Parlamento de Galicia, Bieito Lobeira Domínguez, o secretario executivo da Asociación para a Defensa Ecolóxica de Galiza (ADEGA), Fins Ereixas, e os membros da AA.VV. "A Pergoliña" de Camelle, Luis Miguel Suárez Pérez e da Plataforma veciñal pola Defensa do Patrimonio Cultural de Quilmas (Carnota), Xosé Manuel Casais González, participarán neste encontro para o debate dunha das medidas políticas máis polémicas dos últimos tempos. O encontro celebrarase no recinto feiral de Arzúa (rúa Padre Pardo), recinto que acollerá tamén, na segunda xornada do festival, o xa tradicional foro ecolóxico. Nesta ocasión, “participación social e ecoloxía, ferramentas para fortalecer a democracia” é o tema que centrará as intervencións dos colectivos e persoas que participen nunha iniciativa pioneira que se consolida coma un foro de análise e posta en común e das iniciativas medioambientais en Galicia. Será o domingo 19 ás 19 horas. Feira ecolóxica e Xogos da Terra Preto de 50 expositoras e expositores con produtos ecolóxicos de horta e limpeza, diversos xeitos de cociña ecolóxica, terapias alternativas, unha parte reservada á artesanía…, son só algunhas das propostas, relacionadas todas coa defensa do medio ambiente, que se poden atopar na que constitúe a meirande feira ecolóxica do país. Desde as 11 da mañá do sábado estará aberta ao público. Ademais, Terractiva prestou e presta especial atención ao público infantil, para o que programa os “Xogos da terra”, unha ludoteca na que aprenderán a convivir coa contorna desde a diversión e o lecer, ademais dunha función específica de títeres, o sábado ás 19 horas, e un obradoiro no que poderán iniciarse ao teatro, o mesmo sábado de 18.30 a 21.30 h. Ademais, o domingo ás 13 horas, o Teatro Tradicional de Títeres de Chile porá tamén no escenario a “El león y el ratón”. Estas e as demais actividades do festival, agás os cursos Formaterra, son de balde. Galeuzca e Formaterra Terractiva é un festival de alternativas, multidisciplinar e que promociona as artes e a diversidade. Neste sentido, o festival Galeuzca musical leva de novo a Arzúa unha selección de grupos galegos, vascos e cataláns que este ano pasa por contar coa presenza de O Sonoro Maxín desde Galiza, de La Troba Kung-Fú desde Catalunya e por Sorkun que chega de Euskal Herria. Será o sábado 18 ás 22 horas no Campo da Feira e con acceso libre e de balde. De novo, Galiza, Euskal Herria e Catalunya unidas a través da música. Outra das seccións imprescindíbeis do Terractiva é o Formaterra. Neste sentido, son varios os cursos se van celebrar no marco do Terractiva 2008. A sección Formaterra inclúe formación en bioconstrucción, sistemas de edificiación respectuosa coa contorna, kundalini, bhangra, ou danza india da alegría, aromaterapia e ruptura de vínculos, método para desprenderse de lazos emocionais. Os cursos, para os que aínda te podes inscribir no 981582836 ou en info@culturactiva.org, vanse desenvolver durante os dous días do festival con prezos que oscilan entre os 50 e os 70 euros e ao final de cada un deles expedirase un diploma acreditativo. Ademais, máis de dez obradoiros gratuítos con temáticas diversas coma a compostaxe, a cociña vegana ou as terapias alternativas celebraranse tamén no festival.

Galeuzca leva de novo a Arzúa a maxia da cultura dos pobos

La Troba Kung-Fú, O Sonoro Maxín e Sorkun son as propostas que presenta a edición 2008 do Galeuzca. O sábado 18, a partir das 22 horas, no arzuano Campo da feira e con entrada de balde poderase gozar destes concertos programados baixo a intención de reivindicar, máis unha vez, as tendencias musicais representativas de Galiza, Euskal Herria e Catalunya e dalas a coñecer á cidadanía no marco do festival das artes pola biodiversidade, o Terractiva.

Ademais de procederen territorialmente de ambos os tres países, os grupos do Galeuzca sempre se caracterizaron, e fano tamén nesta ocasión, por interpretar os seus temas case excluisivamente nos idiomas propios reivindicando da lingua e, por extensión, da cultura de cada un deles. No que respecta aos cataláns La Troba Kung Fú, Joan Garriga, logo de pasar oito anos como cantante e líder Dusminguet, ponse á fronte de La Troba Kung-Fú para seguir experimentando coa rumba catalana e con ritmos latinos como a cumbia. Nacidos en decembro do ano 2005, desde a súa orixe La Troba Kung-Fú dedicouse a sementar cancións que, logo da colleita, foi colgando gratuitamente cada quince días na súa web. Atopando cancións e viaxando por todas as partes, como eles din, chegou “Clavell morenet”, que dá nome ao primeiro disco de La Troba Kung-Fú. Gravado no seu estudo da Fournier, na Garriga, mesturado en MusicLan (Avinyonet de Puigventós) e mas-terizado en The Exchange (Londres), esta nova colección de cancións preséntase en formato de Libro-Disco con 98 páxinas articuladas en tres apartados. Este e outros traballos serán os que musiquen para o público do Galeuzca. O sonoro maxín Para as e os festivaleiros e público galego en xeral, quen integra O sonoro maxín son vellos coñecidos, xa que anteriormente algúns deles pasaron por grupos como Lamatumbá, Mutenrohi ou Cinnamon gum, entre outros. Esta formación ourensana de recente creación anda á procura dun baile sen fin, segundo eles mesmos afirman. Para iso apelan á cumbia e á verbena mentres percorren a xeografía galega de concerto en concerto, ademais de reivindicar este xeito de facer a festa onde o baile se reinventa ao son da música. Esta máquina sonora, este camiñar imaxinativo que están pondo a funcionar O Sonoro Maxín vai dende a cumbia á rumba, ao reggae ou ao ska, actualizando a verbena e levándoa até a fusión musical do s. XXI. Sorkun A mediados dos noventa, a Sorkun propóñenlle entrar en Kashbad. Pouco despois gravan a primeira maqueta e é entón cando Fermín Muguruza os convida a tocar no Hitz Egin. Sorkun colabora con Negu Gorriak, Joxe Ripiau, Ekon, Flitter, etc... Logo de sete anos de grande disciplina e percorrer todo Euskal Herria, Cataluña e Galicia tocando, Kashbad decide parar para emprender novos camiños. En 2002 Sorkun decide probar sorte cun primeiro disco en solitario. Dous anos despois, no 2004, Fermín leva a directo o seu traballo In-Komunikazioa, contando con Sorkun para cantar como corista. Nada máis rematar a xira, Sorkun métese no local coa súa banda a dar forma aos novos temas que verán a luz o 28 de Setembro do 2005. Un disco novo que leva o título de “Duna”. Novos instrumentos achegan diferentes cores aos temas de “Duna”. Moita variedade de estilos no mesmo traballo, é o que fai de Duna un disco de fácil escoita. Con colaboracións como Tzutzi de Potemkin, Gorka Sesma, Unai Azkune e Gaizka Pereda, entre outros. O Galeuzca no tempo Coa mirada posta no futuro e inspirándonos en outras iniciativas (Triple alianza de 1923 ou Galeuzca de 1933), Coperactiva Cultural puxo en marcha, en 2001, en este proxecto de encontro entre as tendencias musicais máis representativas das tres nacionalidades históricas do estado español (Galiza, Euskal Herria e Catalunya). Partindo da música como elemento aglutinador, con esta iniciativa, Galeuzca pretende crear un espazo de encontro e relación entre os nosos pobos no que difundir as nosas propostas artísticas propias, proxectando a condición plurilingüe e pluricultural do estado. Neste caso, a proposta tén como organizador ao Concello de Arzúa, como entidade finaciadora á Deputación da Coruña e desde a xestión atópase Coperactiva Cultural.

Aínda podes inscribirte nos cursos Formaterra con prazas libres

Coperactiva Cultural informa que rematou o prazo de inscrición nos cursos formativos do Terractiva 08. Se ben, aínda podes inscribirte nos cursos que gocen de prazas libres. Ademais destes cursos, unha fin de semana repleta de actividades relacionadas co medio ambiente e a ecoloxía están agardando por ti en Arzúa. Sigue lendo.

Neste sentido, diversos cursos se van celebrar no marco do Terractiva 2008. A sección Formaterra inclúe formación en bioconstrucción, sistemas de edificiación respectuosa coa contorna, bhangra, ou danza india da alegría, aromaterapia e ruptura de vínculos, método para desprenderse de lazos emocionais. Os cursos vanse desenvolver durante os dous días do festival con prezos que oscilan entre os 50 e os 70 euros e ao final de cada un deles expedirase un diploma acreditativo. Para poder formar parte do alumnado do Terraciva é preciso chamar ao 981 58 28 36 ou escribir un correo electrónico indicando esta solicitude a info@terractiva.org Máis info en www.terractiva.org

Terractiva 2008 preséntase como a meirande feira ecolóxica de Galicia

O festival das artes pola biodiversidade, Terractiva, presenta unha nova edición para os próximos 18 e 19 de outubro cargada de actividades para todas as idades. A que “é a feira ecolóxica máis grande de Galicia”, segundo afirmou a coordinadora do festival, Txeli Vicente, contará con máis de 40 expositores, 5 cursos formativos, diversos obradoiros e o Galeuzca musical, feitos que o alcalde arzuano, Xaquín García valorou “moi positivamente” de cara a continuidade do evento.

Un grande mercado verde abrirá de novo as súas portas nesta edición 2008 amosando diversos xeitos de cociña ecolóxica, produtos ecolóxicos de horta e limpeza, terapias alternativas, relacionadas todas coa defensa do medio ambiente aínda que tamén hai unha parte reservada á artesanía. A proposta que, en palabras do alcalde Xaquín García está financiada "nun 80 por cento por parte da Deputación da Coruña e cun 20 por cento achegado polo Concello", congrega a cada vez máis hai produtores da zona e "tamén se ve un aumento de visitantes", en especial dos veciños de arzúa, continuou a dicir o rexedor arzuano. O único festival medioambiental de Galicia Neste sentido, e logo de presentarse no día de hoxe en conferencia de prensa, a edición 2008 celebrarase "o único festival medioambiental de Galicia", como afirmou Txeli Vicente. Non só avalan a esta feira ecolóxica a súa magnitude ou a variedade e riqueza das súas propostas, senón que pasa tamén pola formación co programa de cursos e obradoiros gratuitos que presenta, o Formaterra. Desde o seu nacemento, este encontro coa ecoloxía a través das artes e pola diversidade converteuse no único espazo que reúne a colectivos, asociacións, expositoras e expositores, docentes, alumnado e xente interesada en vivir nun mundo máis ecolóxico. Terractiva é un festival de alternativas, multidisciplinar e que promociona as artes e a diversidade. Neste sentido, ademais das videoproxeccións contínuas programadas, o festival Galeuzca musical leva de novo a Arzúa unha selección de grupos galegos, vascos e cataláns que este ano pasa por contar coa presenza do Sonoro Maxín desde Galicia, da Troba Kung-Fú desde Catalunya e por Sorkun que chega de Euskal Herria. Será o sábado 18 ás 22 horas no Campo da Feira e con acceso libre e de balde. De novo, Galiza, Euskal Herria e Catalunya unidas a través da música. Unha feira ecolóxica que medra e cala na sociedade No apartado "Altofalante", logo de catro anos, o Foro Ecolóxico dá pé novamente a un encontro para todo o movemento ecolóxico do país. A esta afirmación feita durante a rolda de prensa pola coordinadora do festival, Txeli Vicente, desde a entidade xestora do mesmo, Coperactiva Cultural, apóiana seis edicións ás costas e unha traxectoria de centos de expositores e expositoras, colectivos que desenvolveron obradoiros e que foron entrando nesta roda que cada ano facemos xirar coa entrada do outono na vila coruñesa de Arzúa. Neste sentido, e ao fío da importancia do festival como voceiro da ecoloxía, Xaquín García cre importante "concienciar cada vez máis a poboación para coidar o noso medio e a terra, que é o que nos da vida". Ademais, os numerosos obradoiros e o consolidado espazo de ludoteca infantil completan esta proposta. Cómpre destacar que Ademais, os numerosos obradoiros e o consolidado espazo de ludoteca infantil completan esta proposta. Cómpre destacar que Ademais, os numerosos obradoiros e o consolidado espazo de ludoteca infantil completan esta proposta. Cómpre destacar que todo o acceso ao festival é libre e de balde. Só os cursos formativos precisan abonamento. Baixo o lema "A terra e a cidadanía son o noso país" arrinca o Terractiva 2008 para denunciar as grandes eivas que sofre Galicia no que respecta ao desenvolvemento medioambiental. Ademais, o lema deste ano responde a unha vontade estendida na sociedade galega como é a de mirar cara o noso e vivirmos do xeito máis respectuoso posíbel coa contorna.

ABERTO O PRAZO DE INSCRICIÓN NOS CURSOS DO FORMATERRA 2008

Aromaterapia, método bengala de crecemento persoal, kundalini ioga, bhangra, e bioconstrución son as propostas formativas que componen o Formaterra 08. Durante os días 18 e 19 de outubro e dentro do Festival das artes pola biodiversidade “Terractiva”, a vila coruñesa de Arzúa albergará esta nutrida representación de cursos para os que prazo de inscrición remata o día 8 de outubro. Consulta a información completa sobre os Cursos Formaterra 2008

ABERTA A CONVOCATORIA PARA PARTICIPAR NA FEIRACTIVA 2008

DATAS: 18 e 19 de OUTUBRO de 2008 ESPAZO: ARZÚA (A CORUÑA)

A feira medioambiental “Feiractiva” é un espazo expositivo activo e dinámico no que se amosarán, exporán e venderán produtos, ideas, proxectos, descubrimentos... Neste mercado verde queremos reunir ‘stands’ de produtos biolóxicos, produtos ecolóxicos, artesanía, bioconstrución, enerxías alternativas, centros de medicinas e terapias alternativas, colectivos sociais... No marco desta “Feiractiva” desenvolverase, ademais, unha ampla e variada programación cultural pensada para un público multidisciplinar e interxeracional que terá como condutores o mediambiente, a ecoloxía e a biodiversidade. Esta incluirá ao longo de toda a fin de semana cursos e obradoiros formativos, concertos, actuacións teatrais, ludoteca infantil e outras actividades lúdicas, formativas e de denuncia. INTERESADOS/AS EN PARTICIPAR: Aquelas persoas e/ou entidades que puidesen estar interesadas en participar na “Feiractiva”, deberán seguir con atención as condicións e indicacións expostas na sección Feiractiva da web. » LISTADO DE EXPOSITORES/AS ADMITIDOS/AS NA FEIRACTIVA 2008