Se chegaches ata aquí, estaraste a preguntar: Que facemos en Culturactiva?
En Culturactiva cremos na cultura como motor de cambio, como unha ferramenta para mellorar a sociedade. Esa é a razón pola que nos erguemos cada día dende hai máis de 20 anos para traballar na xestión cultural, o teatro , a música, o circo, a produción escénica e musical, a distribución, a xestión integral de programacións e a organización de festivais e proxectos culturais. Así achegamos solucións reais ás necesidades das programadoras de entidades e institucións galegas e estatais.
E, quen somos?
Somos un grupo de pequenas empresas cooperativas, pero sobre todo somos unha única equipa de 15 traballadoras que funciona en rede de forma colaborativa, complementando na xestión cultural, a venda, a producción, a comunicación e administración de proxectos culturais tanto dentro como fóra de Galicia, acompañando a máis de 100 artistas de diferentes xeografías, estilos e linguaxes.
Cada ano realizamos máis de 1.000 actuacións, que se di pronto. Pero non é pola cantidade senón pola calidade que somos a distribuidora galega líder en teatro cómico e de rúa, música e proxectos culturais transformadores. As nosas artistas levan percorridos milleiros de quilómetros desde Galiza, pasando polo Estado español, Portugal, o resto de Europa, Latinoamérica, Palestina, México ou mesmo o Sáhara.
E é que Culturactiva non se entende sen o noso compromiso co país, que se traduce na nosa aposta por espectáculos e festivais que potencian o noso idioma, a igualdade de xénero e a inclusión social, e coa solidariedade internacional. Materialízase no noso soporte e impulso ao colectivo que naceu en Galiza e que agora se espalla por case todos os continentes: Pallasos en Rebeldía. Toda unha rede internacional de artistas de circo que promove a solidariedade e a risa como ferramentas para mudar o mundo. Dende Pallasos en Rebeldía perseguimos a utopía e apoiamos a loita pola supervivencia dos pobos en conflito: Palestina, Brasil, Sáhara, Idomeni, Calais ou Chiapas.
Queremos unha cultura ACTIVA que nos axude a construír o mundo que queremos habitar, dende unha Galiza moderna e orgullosa das súas raíces e concretada con todas as expresións e foros artísticos do panorama internacional.
Esta páxina é demasiado pequena para explicar todo o que facemos e como o facemos, pero pensamos que conseguimos resumir por que é tan necesario. Se queres coñecernos mellor, podes chamarnos, mandarnos un mail, achegarte ás nosas oficinas de Compostela ou vir a unha das máis de 1.000 actuacións que organizamos cada ano!
Ah! E non esquezas seguirnos en redes: