Baobab Teatro é unha compañía pontevedresa que aposta polo teatro infantil de calidade, formada por dous profesionais cunha solvencia fóra de toda dúbida: Óscar Ferreira e Andrea Bayer. Ferreira conta cunha amplísima experiencia como titiriteiro, construtor de monicreques e escenografías, mentres Bayer dirixiu e interpretou espectáculos como Golulá, premiado na Feria de Ciudad Rodrigo, a Mostra de Teatro de Ribadavia ou Domingos do Principal 2008. Traballando xuntos realizaron montaxes como Fíos, O lobo e a lúa, Pum, pum!, Puño, puñete ou Luppo, acadando tamén o recoñecemento do sector e o público en numerosos certames e xirando polas programacións escolares e familiares máis importantes da Península.