NOVAS

Descobre Chamada á Lúa, o videoclip que vén de lanzar Javier Otero Neira e que forma parte de Saraiba

Xa está dispoñible Chamada á Lúa, o primeiro videoclip do novo disco de Javier Otero Neira, que une piano e electrónica con influenzas da natureza e da vida cotiá. Abrir as fiestras para osixenarse e deixarse levar.

Este novo tema forma parte do seu novo traballo, Saraiba, que viu a luz o pasado 21 de marzo. O álbum está composto por sete temas e é o seu disco máis persoal ata a data. "Unha mestura de piano e electrónica que reflicte a miña enerxía interior", afirma.

Javier Otero defínese a si mesmo como un artista polifacético, e máis que nunca, experimental. De formación “clásica”, sempre estivo interesado en todo tipo de músicas.

Javier Otero sempre mantivo unha actividade paralela á súa carreira como pianista no mundo da cultura. É o director artístico do Piano Meeting (Festival de pianos na rúa), e o creador dos “Silent Wifi Music Experience” (Concertos ao aire libre, nos que o son chega a uns auriculares cunha tecnoloxía WIFI).