A maxia e a risa volven a Eivissa cunha nova edición do MAGICLOWN
Do 25 ao 28 de setembro, o festival MAGICLOWN encherá Sant Josep de sa Talaia (Eivissa) de ilusionismo, circo e humor cunha programación para toda a familia.
Sant Josep de sa Talaia volverá converterse en escenario de fantasía na nova edición do MAGICLOWN, o festival que une a maxia, o humor e as artes escénicas ao longo de toda unha fin de semana. Do 25 ao 28 de setembro, diferentes espazos do municipio acollerán unha coidada selección de espectáculos a cargo de artistas de recoñecido talento e compañías do panorama nacional con propostas orixinais e sorprendentes.
A cita con MAGICLOWN 2025 arrincará o xoves 25 en Can Jeroni coa ilusionista Inés La Maga, unha das figuras máis destacadas do panorama nacional, que presentará Magia Inés…plicable, un espectáculo elegante, próximo e cheo de misterio que convida a soñar cos ollos abertos. Un arranque de festival sen dúbida de primeiro nivel que marcará a tónica do resto do programa.
O venres 26 en Sant Jordi, o cómico e mago Adrián Conde dará vida ao Gran Braulio, un entrañable personaxe que mestura maxia, clown e torpeza con grandes doses de humor para toda a familia.
A fin de semana, a programación trasládase ao Auditori Calou de s’Oil, onde o sábado 27 haberá unha dobre sesión. No espazo exterior, a compañía Culturactiva Producións presentará Saaabor!, un saboroso cóctel de humor, música e participación do público en clave de teatro-circo culinario. Xa cara á noite, no auditorio interior, o premiado ilusionista Jorge Luengo, coñecido polas súas televisivas actuacións no programa El Hormiguero, levará ao público a unha viaxe emocional con Ensueños, un espectáculo de gran formato onde a maxia entrelázase coa narración para crear unha experiencia única.
O broche de ouro do MAGICLOWN será o domingo 28 tamén en Calou de s’Oil. Pola tarde, o Auditori Interior acollerá Charlatán Rodríguez, unha divertida proposta de Rendos Pequeno que mestura clown, improvisación, música e moita interacción co público. Posteriormente, no espazo exterior, o multifacético Javier Ariza pechará o festival con Carman, un orixinal número de circo protagonizado por un Seat 600 e o seu inseparable condutor, que se converte en escenario, pista de baile e vehículo para o humor máis vándalo.
Todos os espectáculos de MAGICLOWN son gratuítos e de acceso libre. Este é un evento organizado polo Concello de Sant Josep de sa Talaia, coa coordinación e produción a cargo de Culturactiva S. Coop. Galega. Podes acceder á programación completa e máis información sobre artistas e espectáculos na web oficial do festival: magiclown.org
