NOVAS

A música de Javier Otero Neira soará no San Pietro in Montorio de Roma

A música de Javier Otero Neira soará na Real Academia de España en Roma con motivo da celebración do seu 150 aniversario. O pianista estradense actuará no Templete de San Pietro in Montorio co seu espectáculo “Xogo de Espellos”. Será o vindeiro 28 de abril nun dos actos que a institución organiza para festexar e dar a coñecer a súa historia.

“Xogo de Espellos” é un proxecto creado por Javier Otero Neira para piano, electrónica e orquestra que nesta ocasión estrea a súa versión para piano e electrónica. Nel, o piano funciona como fío condutor nunha clara aposta pola vangarda, con influenzas da natureza e da vida cotiá.

Javier Otero Neira iniciou este proxecto xunto á Real Filharmonía de Galicia o pasado mes de febreiro no Auditorio de Galicia e nel recolle cancións dos seus discos “Reconstruction” e “Saraiba” xunto a temas de nova creación e poemas en galego da súa propia autoría. Unha aposta experimental e contemporánea coa que Javier procura achegarse ao público internacional nunha xira que o levará a mostrar a súa obra en varias cidades europeas.

Javier Otero Neira defínese a si mesmo como un artista polifacético e experimental. Inmerso na gravación dun disco con música para piano de Haydn, continúa ca súa carreira paralela coa súa música. A súa versatilidade e interese en todo tipo de músicas levouno a asinar o seu contrato de Artista Yamaha no ano 2018. Con dez traballos discográficos ás súas costas, continúa facendo o seu propio percorrido polo mundo musical.