NOVAS

O Festaclown Vilagarcía pechou a súa edición de 2024 con éxito absoluto de público

Arredor de 15.000 persoas acudiron aos espectáculos do Festaclown Vilagarcía, entre o 19 e o 24 de agosto.
Miguel de Lucas fíxose co premio do público da Mostra Festaclown, mentres que a compañía Muu levou o premio do Certame Festaclown con Crunch 2.

Durante seis días, do 19 ao 24 de agosto Vilagarcía converteuse no epicentro da risa grazas ao Festaclown, celebrado do 19 ao 24 de agosto. Unhas 15.000 persoas asistiron aos espectáculos de circo, maxia, clown, teatro e contos organizados nesta novena edición do festival.
Desde a organización destacan que a pesar da choiva que acompañou o festival nalgúns días, e o cambio de datas respecto a anos anteriores, conseguiron manterse as cifras de asistentes, o que consolida ao Festaclown entre o público vilagarcián e visitante e manteno como o festival de artes circenses máis relevante no panorama escénico galego.
O público de Festaclown, que cada edición valora os espectáculos para escoller aos galardoados, premiou ao mago Miguel de Lucas na Mostra Festaclown, na que participaban todos os espectáculos da noite, cunha valoración de 4,94 sobre 5. Esta cifra amosa o abraio e satisfacción do público co seu espectáculo Maxia e Humor, que pechou o Festaclown o sábado á noite. Os espectáculos acadaron, en xeral, moi boas valoracións por parte do público. Pola súa banda, no Certame Festaclown, no que competían os espectáculos da tarde, resultou gañadora a compañía galega Muu, co seu espectáculo de superheroes Crunch 2, que encantou ao público máis cativo.
Coa resolución destes premios púxose o feche a esta edición de 2024, na que participaron vinte compañías e artistas procedentes de diferentes puntos de Galicia e do estado, así como doutros países, como Colombia, Marrocos ou Arxentina. O éxito do Festaclown radica nas excelentes propostas artísticas e, especialmente, no público fiel que cada ano desfruta deste festival da risa.
O Festaclown está organizado polo Concello de Vilagarcía, co apoio ca Consellería de Cultura da Xunta de Galicia. Culturactiva S. Coop. Galega é a responsable da coordinación e produción do festival.