TIAM Gz nace en outubro de 2018 na comarca de Chantada cando catro amigos de sempre deciden xuntarse para comprar un micro e facer música. Desde os inicios, o grupo caracterízase por facer cancións variadas e diversas dentro do rap protesta, combinando estilos que van desde o máis clásico do xénero até ritmos do máis bailables e innovadores.

As letras que compoñen o Torozas, o Iagueiro e o Alessov sobre as melodías de Mr. Mati teñen un alto contido social, denunciando as desigualdades e reivindicando o uso do galego como lingua para a vida.

Cada un dos integrantes da banda está influenciado por diferentes grupos e por estilos musicais do máis variados, algo que se percibe non só nas propias cancións senón tamén nos directos. Grupos pioneiros de rap en galego como Dios Ke te Crew ou Rebeliom do Inframundo tiveron, sen dúbida, unha grande inflluencia, así como outros grupos de rap protesta SonDaRúa ou Los Chikos del Maíz, mais tamén artistas como Nikone, Natos y Waor. En canto á produción dos seus temas, Major Lazer ou Zecca son algunhas das súas referencias. 

TIAM Gz contan cun disco, [De] Construción, onde mesturan diferentes estilos: hip-hop, pop, acústica, trap, etc. Incluso teñen a súa propia versión da Muiñeira de Chantada: a Muinheira-rap. Ademais, atrévense cun reggaetón en toda regra, “Ruada”. 

O seu último lanzamento de estudo é o EP Volta ao Xogo, con sons electrónicos.