Kinetiko

KINETIKO é unha instalación artística e artesanal creada por Xirapaus, o dúo formado por Ero Vázquez e Manu Taboada, que mergulla ao público no fascinante universo dos autómatas. A través dunha colección de nove pezas mecánicas construídas integramente a man, o espectáculo convida a descubrir máquinas sorprendentes capaces de crear música, contar historias ou recrear efectos especiais propios do teatro e do cine.

Presentado como unha exposición con visitas guiadas teatralizadas, cada autómata cobra vida revelando pequenos mundos cheos de humor e imaxinación. Ao longo do percorrido, o público coñece non só os segredos técnicos destes mecanismos, senón tamén a tradición, a cultura popular e a filosofía artesanal que hai detrás de cada peza, cun discurso adaptado a diferentes idades.

A proposta inclúe tamén un teatriño de guiñol automatizado que rende homenaxe ao clásico títere de cachiporra, convertendo a visita nunha experiencia lúdica, educativa e interxeracional.

KINETIKO é unha instalación flexible que pode adaptarse a diferentes espazos e eventos, incluíndo a rúa, onde funciona perfectamente como atracción cultural para públicos de todas as idades.